ذاكر اقل .. ذاكر بذكاء

ذاكر بذكاء

ذاكر بذكاء واتعلم افضل طرق المذاكرة

مفيش طريقة معينة او واحدة تقدر تطبقها على كل الناس عشان يقدروا يذاكروا اسرع. ولكن كل شخص بيقدر يذاكر بطريقة معينة بتنفع معاه وممكن تنفع مع غيره او لا. 

هل فى يوم سألت نفسك هو ليه زميلى " فلان " بيذاكر قبل الامتحان بيوم او اتنين وينجح وشخص تانى بيذاكر قبلها بفترة ويبذل مجهود اكبر وممكن ميجبش نفس المجموع لا دا ممكن اقل كمان من زميلنا " فلان "!!!

هاقولك على السر الخطير 😎

الموضوع سهل وبسيط وبيتلخص فى كلمتين اعرف نفسك: اى نوع من المتعلمين انت؟؟؟

طيب من غير كلام كتير ليه أعرف انا اى نوع من المتعلمين وهاستفاد ايه؟ اولا بعد ما تحدد طريقة تعلمك هاتقدر تحدد طريقة المذاكرة الانسب ليك وبالتالى دا هايوفر عليك وقت ومجهود كبير. 

دليلك الكامل لافضل طرق المذاكرة

انواع المتعلمين (Learner Styles):

1. المتعلمين عن طريق الرؤية (Visual Learners):

مواصفاتهم:

هم الاشخاص اللى بيفضلوا استخدام الصور والالوان، وبيربطوا اى حاجة بصورة او رسمة. 

مثال لو سالتك عن قطة مثلا اول حاجة بتيجى فى بالهم هى صورة القطة، مش اسمها ولا صوتها.

أفضل الطرق للمذاكرة:

• كروت المذاكرة (Flash Cards): مثال لو بتذاكر اى لغة وبتحفظ كلمات ممكن تحط على الكارت من جهه صورة تعبر عن الكلمة اللى بتحفظها والجهة التانية تحط الكلمة اللى بتحفظها.
• الخرائط الذهنية (Mind Map): هاقولك باختصار تعملها ازاى ورقة بيضاء هاتحط العنوان الرئيسى فى نص الصفحة ثم بلون مختلف تبدا تخرج باسهم من العنوان الرئيسى وتكتب النقط الاساسية وتخرج باسهم من كل نقطة اساسية بنقاط فرعية وهكذا بس راعى انك تستخدم الوان تحدد بيها كل عنوان هاتتكلم عنه داخل العنوان الرئيسى ممكن ترسم رسمة صغيرة ليها علاقة باللى بتتكلم عنه. تنوع الالوان بيخليك تفتكر اسهل واسرع وبيخلى عملية التعلم ممتعة.
• تحديد النقاط الاساسية بالالوان (High Light): لما تيجى تقرا كتاب ممل ومليان كلام فقط . طريقة  عمل highlight على الفقرات او النقط المهمه بيسهل عليك عملية المذاكرة والمراجعه.

2. المتعلمين عن طريق السمع (Aural Learner):

مواصفاتهم:

هم اشخاص يحبون الموسيقى، وبيربطوا اللى بيفتكروا بصوت معين.
فاكر صاحبنا اللى بياكر قبل الامتحان بيوم وينجح دا متعلم عن طريق السمع يعنى اللى بيسمعه بيفتكروه ويحتاج بس مراجعه بسيطة قبل الامتحان.
نرجع تانى لمثال القطة لو سالت عن قطة مثلا اول حاجة بتيجى فى بالهم هى صوت القطة، مش اسمها ولا صورتها.

أفضل الطرق للمذاكرة:

• تسجيل الدروس او المحاضرات: ممكن تسجل للمحاضر وترجع تسمع الدرس تانى او انك تقرا المحاضرة او الدرس بصوت عالى وتسجلها لنفسك وترجع تسمعها وقت ماتحتاج تذاكر.
• الضوضاء البيضاء (White Noise): دا مصطلح معناه انك بتسمع وانت بتذاكر موسيقى هادية او انك تقعد تذاكر فى كافيه او تشغل اى ابليكشن فيه صوت للمطر ودا بيساعد جدا على التركيز وهايخليك كمتعلم سمعى تربط اللى ذاكرته بصوت من اللى بتسمعه.

3. المتعلم اللفظى (Verbal Learner):

مواصفاتهم:

بيفضلوا التعلم عن طريق الكتابة، والقراءة بصوت عالى.

أفضل الطرق للمذاكرة:

• تلخيص الدرس فى ملاحظات (Take Notes): تلخيص الدرس الى فقرات اصغر او كتابتها فى نقاط رئيسية.
• عمل اختصار بالحروف الاولى لجملة او مقطع : لتسهيل الحفظ باختصار مقطع بحروفه الاولى ، مثال: "بايثون من لغات البرمجة" هاختصرها ل "بلب" واحفظ الاختصار بس وهكذا ودا بيسهل عملية الحفظ جدا، كأنك بتحط شفرة لدروسك وانت بس اللى عارفها. 😁
• من الطرق المفيده كمان انك تشرح اللى فهمته لشخص اخر.

4. المتعلم الحسى (Physical Learner):

مواصفاتهم:

بيفضلوا التعلم عن طريق فك وتركيب الاشياء ودا عشان يعرفوا الاشياء دى معمولة كدا ليه وطريقة عملها، بيحبوا الحركة وبيملوا من الدراسة لفترات طويلة.
نرجع لمثال القطة تانى لما تقولهم قطة اول حاجة بتيجى فى بالهم هى شعورهم ناحية القطة مش صورتها ولا اسمها (طريقة كتابتها).

أفضل الطرق للمذاكرة:

• الحركة: اتمشى وانت بتحفظ او بتقرأ درس معين الحركة فى العموم، حتى أكل  اللبان هايساعدك.😁
• قسم جلسات المذاكرة لجلسات قصيرة مثلا كل جلسة 25 دقيقة وتاخد 5 دقائق راحة وهكذا عشان متملش.
• كروت المذاكرة (Flash Cards): انا عارفة هاتقولوا دى طريقة من طرق مذاكرة المتعلم المرئى بس الطريقة دى بتساعد جدا لانها بتساعده على التذكر لانه بيربط ملمسها او طريقة تحريك الورقة بالمحتوى.

5. المتعلم الذاتى/المنفرد (Solitary Learner):

مواصفاتهم:

بتفضل تقعد لوحدك وانت بتذاكر بتركز اكتر فى الهدوء وبعيد عن الناس. دايما بتبقى عايز تحدد الهدف من مذاكرتك او اطلاعك على موضوع معين وايه اللى هايضيفهولك الشئ اللى بتتعلمه.

أفضل الطرق للمذاكرة:

• طبعا بيئة المذاكرة: تهيئة بيئة هادية للمذاكرة بدون تشتيت.
• التخطيط: تحديد هدفك من مذاكرة درس معين او مادة عن طريق تقسيمها لاجزاء اصغر ووضع مواعيد لانجاز هذه الاهداف.
• عمل log بكل العناوين الرئيسية فى المذاكرة وعند انهاء جزء معين بتحط علامة على اللى خلصته دا هايديك احساس بالانجاز ويشجعك تكمل.
• تلخيص الدرس فى ملاحظات (Take Notes): تلخيص الدرس الى فقرات اصغر او كتابتها فى نقاط رئيسية.

6. المتعلم الاجتماعى (Social Learner):

مواصفاتهم:

بتحب تتعامل مع الناس وبتركز اكتر وانت بتذاكر مع شخص اخر.

أفضل الطرق للمذاكرة:

• مذاكرة فى مجموعة (Study Group): مع شخص واحد او اكثر عن طريق مناقشة الدرس مع زمايلك .
• كروت المذاكرة (Flash Cards): استخدمها مع زمايلك عن طريق تلخص الدرس فى صيغة سؤال وجواب سؤال فى جهه والاجابة الجهه التانية دى طريقة بتخليك تحفظ وتفتكر اسهل.

فى النهاية انت المفروض عرفت اى نوع من المتعلمين انت؟ وبالتالى هاتقدر تحدد انسب طريقة مذاكرة ليك.، وتوفر على نفسك وقت ومجهود كبير. الطريقة دى تقدر تطبقها على اى حاجة عايز تتعلمها سواء لغة او كورس فى اى مجال اى حاجة من الاخر.  

اتمنى تطبقوا الطرق دى وتقولولى فرقت معاكم ولا لا؟ وانا متأكدة انها هاتفرق كتير.

اميرة😊